LAOAG CITY – Inrubuwat ti Mariano Marcos State University iti Ilocandia Unliweave Patterns project idiay Laoag International Airport.
Segun kenni Dr. Lawrence Eclarin, Technology Generator Lead ti nasao a proyekto a gagemna a tulongan a papigsaen ti Inabel Weaving Industry ditoy probinsia babaen kadagiti baro nga inabel patterns.
Inbatadna a dagiri nadakamat a patterns ket naaramid babaen iti mathematical concepts.
Iti agdama ket addaanda iti 20 a baro a patterns pakairamanan ti stem, butterfly, ken diamond pattern ken dagitoy ket incubated iti Mariano Marcos State University-Technology Business Incubation.
Innayonna a mabalin a gundawayan dagiti Local Government Units, non-government organization, private individuals nanagruna no adda dagiti specific patterns a kalikagumda nga ipaaramid.
Inpakaammona a dagitoy a pattern a maaramidda ket maaramid babaen iti tradisional a panagabel.
Inpetteng ni Dr. Eclarin a ti maysa a pattern ket agbalor ti P20,000 pakairamanan ti prototype, assistance training, pannakaikabil iti technology business incubation, ken inclusivity of the design.
Inpakaammo ni Dr. Nathaniel Alibuyog, Vice President for research, development, and innovation a 60% iti mapaglakoanda ket maited kadagiti nangaramid ti patterns a kas insentibo ken ti 40% ket maited iti unibersidad tapno mausar iti research ken development projects.
Inadmitir ni Ms. Angel Lao, mentor ti nasao a proyekto a dagiti new patterns ket nabababa ti cultural significance-na ngem nangatngato iti tyansana a mailako.
Kinunana a babaen iti modern technology, kasapulan a makigiddan dagiti Ilokano tapnu mapno dagiti patterns dagiti lokal a tela ken saan nga agpapaudi kadagiti tela nga adda iti ruar ti probinsia ken pagilian.
Nupay kasta, inpetteng na a dagiti a traditional petterns ket rumbeng a saan a lipaten gapu ta dagitoy ket paset iti kultura dagiti ilokano.
