LAOAG CITY – Mamati ni Ms. Angelie Maranan Banaag, maysa nga Ilocano Artist ditoy Ilocos Norte nga in-inuten a magungun-od dagiti babbai ti gender equality wenno ti patas a pannanakatrato kadakuada no idasig idi umun-una a panawen.
Segun kenkuana, iti agdama nga henerasion ket saan a mailibak nga adun ti kabaelan dagiti babbai iti nagduduma a tay-ak iti lubong no sadino ket mangipapaay ti pammadayaw saan laeng ditoy Pilipinas no di ket iti intero a lubong.
Inbatadna a daytoy ti pammaneknek a no ania ti kabaelan dagiti lallaki ket kabaelan metten dagiti babbai a magun-od ken maipannakkel iti sangalubungan.
Kunana a kas maysa a babai ket kalikagumna a maital-o dagiti amin a padana a babbai nga isu ita ti kangrunaan nga adbokasiyana tapno awan ti mabati ken amin ket mairaman iti panangitandudo ti pagsayaatan para kadagiti padana a babbai.
Inlawlawagna nga adu ti babbai nga adda iti likudan dagiti ballaigi iti asinoman kas kadagiti inna, manang, ikit, lola ken dadduma pay.
Kabayatanna, daytoy a gagem ti Ilocano Artist ket kas paset ti pannakaselebrar ti International Women’s Day ita nga aldaw.
