LAOAG CITY – Naragsak ni Mr. Eduardo Teodoro Ramos Jr., maysa a Columnist iti Ilocano Sentinel ti pannakaipangato iti 10 a ribu a pisos ti teaching allowance dagiti mangisursuro kadagiti pampubliko a pagadalan.
Daytoy ket kalpasan a pinirmaan ni Presidente Ferdinand Bongbong Marcos Jr. ti Republic Act No. 11997 wenno ti Kabalikat sa Pagtuturo Act.
Segun kenkuana, dakkel a tulong daytoy para kadagiti maibilang a backbone ken frontliners iti sektor ti edukasion.
Inbatadna a babaen iti daytoy ket masupusupan dagiti kangrunaan a kasapulan a learning materials dagiti mangisursuro para iti napinpintas a pannakaiyuswat ti klaseda.
Kabayatanna, inlawlawagna a masapol a maikkan ti importansia iti pannakaipaay ti naan-anay a proteksion para kadagiti sumagmamano a mangisursuro gapu iti panagabuso kadakuada.
Innayonna a suportado daytoy ken ni Vice President ken Education Secretary Sara Duterte iti panangimatonna iti sektor ti edukasion ngem no bilang adda dagiti saan a nainkalintegan a banag nga aramidenna ket rumbeng a kontraenna.