LAOAG CITY – Napili kas Top 10 Finalist ti maysa a documentary film a napauloan a “Tawid” iti Dokubata Festival 2024.
Segun ken ni Mr. Ryand Ugalde, nangisurat ken direktor iti nasao a documentary film, ti Dokubata Festival 2024 ket indauloan ti The National Children’s Commission on Television a tinawen a maisaysayangkat no sadinno ditoy a maipabuya dagiti estoria maipanggep kadagiti ubbing.
Inbatadna a kadagupan kadagiti sumurok-kumurang 100 nga entries a nakipaset iti nasao a kompetision ket sangapulo laeng ti napili kadakuada a sumrek iti Top 10 Finalist.
Inlawlawagna nga iti daytoy a tawen ket nakikammayet ti The National Children’s Commission on Television iti Kapuso Network kangrunaanna iti “I Witness” nga isu ti nangarisit ken nangtingiting a naimbag kadagiti Top 10 Finalist.
Mainaig iti daytoy, napanunotan ni Mr. Ugalde ti nangaramid iti nasao a documentary film kalpasan nga adda ti nabuyana a bidyu ti maysa nga ubing nga agtawen iti walo nga agar-aramid iti panagabel a saan a gagangay nga ar-aramiden ti maysa nga ubing.
Inpalgakna nga agpaut laeng iti uneg ti walo a minuto ti “Tawid” ngem inadmitirna nga adu a pannubok ti napasaranda nangruna ket uppat a ribu a pisos laeng ti inin-inotda a kuarta a pinangsupusop tapno mabukel ti nagrigatanda a documentary film.
Innayonna a babaen iti daytoy ket maitandudo dagiti maipanpannakkel ken nabaknang a kultura dagiti agtutubo nga Ilokano.
Naammoan a ti “Tawid” ket kakaisuna laeng nga Ilocano Documentary Film entry a nakipaset iti Dokubata Festival 2024.
Kabayatanna, napauloan a “Tawid” iti nasao a documentary film gapu ta manggutigot kadagiti ub-ubing a kaputotan tapno ad-adda a maiwaragawag ti naisangsangayan a tawid ni Manlilikha ng Bayan wenno National Living Treasures Awardee a ni Lola Magdalena Galinato Gamayo.