LAOAG CITY – Ibilang ni Mr. JC Flores, Voice Actor ti maysa a television network a nagasat isuna ti nagbalin a karerana iti biag gapu ta alisto a nakastrek iti trabaho.
Segun kenkuana, ubing pay laeng ket arapaapna ti agbalinen a Voice Actor gapu kadagiti mangmangngegna iti radyo.
Inbatadna a nangrugi a naasa ti talentona idi first year high school daytoy agingga a nagturpos iti kolehio nga isu ti kinalikagumanna a maala a trabaho.
Kunana a nagasat isuna gapu ta agarup amin a panag-audition-na ket makapasa rason nga innala daytoy nga oportunidad tapno ad-adda a maasa ti talentona.
Inlawlawagna a napadasanna pay ti agbalin a reliever kas Director no bilang awan dagiti main Director iti maysa a show iti TV network.
Mainaig iti daytoy, inpakaammo ni Flores a saan a nagbalin a nalaka ti kapadasanna gapu ta naiget dagiti maipakpakat a pagalagadan nangruna iti pannakaipatungpal ti “be on time rule.”
Innayonna a babaen iti talentona ket mangipakita ken mangipaneknek a nasirib dagiti Ilokano.
