LAOAG CITY – Inpasingked ni Dr. Jonathan Noble, president ti Ilocos Norte Medical Society nga adda iti makaumanay a supply ti Personal Protective Equipment wenno PPE ditoy Ilocos Norte.
Inbatad nga iti agdama ket addan dagiti magatang a nadumaduma a klase ti PPE ditoy probinsia no sadinno a mabalin pay a gumatang dagiti kailian ti PPE
kadagiti klinika.
Inbunannagna a karaman ditoy dagiti face masks, suits, gloves ken dadduma pay.
Kabayatanna, inpakaammo ni Dr. Noble a naep-epektibo met laeng dagiti nangingina a face masks.
Impalgakna a ti “powered air filter respirator” ti kaepektiboan, sumarsaruno ti N95 mask a 95 a porsiento ti proteksyon ti tao ken ti surgical mask ket addaan ti 70 agingga iti 80 a porsiento ti maipaayna a proteksyon.
Innayonna a ti cloth mask ket dipende iti klase ti lupot ken dagiti ordinario wenno gagangay a klase ti lupot ket bassit laeng ti maitedna a proteksyon.
Pakaseknan daytoy, inlungalong ni Noble a masapul a saan a taliawen ti kinangina ti face mask no kayat ti maproteksionan manipud iti virus ti COVID-19.
