LAOAG CITY – Manamnama a maestablisar ti kaunaan nga Ilocos Norte Agricultural Trading Center iti ciudad ti Batac.
Daytoy ket kalpasan a naipasa iti maikadwa ken maudi a panakaibasa ti Draft Provincial Resolution No. 2024-10-350, maysa a resolusyon tapno agpirma iti agreement ti Gobierno Probinsial ken City Government of Batac.
Segun iti Chairman ti committee on Laws iti Gobierno Probinsyal, daytoy a katulagan ket mangipasimudaag ti panangipalubos ti city government of Batac nga usaren ti Gobierno Probinsyal ti paset ti daga a kas donasyon a pakaipatakderan ti kaunaan nga Ilocos Norte Agricultural Trading Center.
Segun kenni Atty. Juan Alfonso Augustus Jose ti mangidadaulo ti Ilocos Norte Agriculture and Fisheries Extension Center (INAFEC), daytoy ket maiyannatop ti nagbalin a kiddaw ni Gov. Matthew Marcos Manotoc iti Deprtment of Agriculture a panakaestablisar ti trading center ditoy probisiya nu sadinno a nangipaay ti Department of Agriculture ti 30 a milyon a pisos.
Kunana nga iti agdama ket 30 a porsienton a naaramid ti establishimento a masarakan iti abay ti merkado publiko ditoy ciudad.
Innayonna a kalikagumda ti mangiwayat ti benchmarking kadagiti dadduma a probinsiya nga addaan ti trading center tapno maaddaan da ti ideya nu kasano nga i-operar ti nasao a pasdek.
Kabayatanna, ti trading center ket sentro ti komersiyo no sadinno a ditoy a maidiaya dagiti nagduduma a produkto manupid kadagiti nagduduma a lugar.
