LAOAG CITY – Agsagsaganan ti gobierno probinsial babaen ti Ilocos Norte Sports and Development Office para iti pannakipartisipar ti probinsia iti Philippines Series 2023.
Segun ken ni Mr. Faivo Bartolome, Sports Consultant ti Gobierno Probinsial, 5 a team ti maipatulod a makipartisipar iti nasao a paay-ayam idiay Ilagan, Isabela.
Inbatadna a daytoy ket babaen iti naiget a suporta ti gobierno probinsial para kadagiti agad-adal a makibinnalubal iti nasao nga ay-ayam.
Mainaig iti daytoy, inlawlawagna nga iti agdama ket manarimaanen ti panagsansanay dagiti atleta ti probinsia a karaman kadagiti nasao a team.
Kunana a maisayangkat ti North Luzon eliminations iti masungad a Pebrero 4 agingga iti Pebrero 12.
Inbagana a pakipartisiparan daytoy ti rehion uno, dos, tres ken ti Cordillera Administrative Region wenno CAR.
Inlawlawagna a tallo a team ti ipatulod ti probinsia iti benneg ti Baseball ti 12 under, 13 under ken 16 under idinto a dua iti benneg ti Softball Girls ti 12 under ken 14 under.
Innayon ni Bartolome a ti mangabak iti elimination ket sumrek iti finals ken ti mangabak ti mangibagi ti pagilian iti Asia Pacific ken ti mangabak iti Asia Pacific ti maikkan ti gundaway a makilaban iti world series idiay Estados Unidos.
Maipalagip a nagibunong ti DepEd Laoag City kadagiti sumagmamano nga sports equipments kadagiti napili a pagadalan ditoy Siudad kas ti Ilocos Norte National High School, Ilocos Norte College of Arts and Trade, Buttong Integrated School, Laoag Central, Shamrock, Gabaldon, Faustino Reyes Memorial, Amarosa ken Eulalio F. Siazon.
Naammoan a dagiti sports equipments a naited ket pakairamanan ti chess boards, nagdumaduma nga sports balls, sports nets, ramit para iti baseball game ken tool para iti gymnastics.
