LAOAG CITY – Nakasaganan dagiti atleta a pambato ditoy Ilocos Norte a makibinnalubal para iti 2024 Palarong Pambansa.
Segun ken ni Mr. Cesar Bucsit, Department of Education, Regional Administrative Officer V – Region 1 Spokesperson, naiget a dumaldalan dagiti amin nga atleta ti maudi a panagsanay ita nga aldaw sakbay ti pormal a panagrugi ti kompetision inton bigat, Hulio 11.
Inbatadna a dumanon iti sumurok 500 nga atleta ti mangibagi ditoy rehion uno kadagiti nagduduma nga sports events kontra kadagiti atleta manipud met kadagiti nagduduma a paset ditoy probinsia.
Inlawlawagna nga adda dagiti sayangguseng nga adda dagiti umaayam ti maipagarup a nakaptan ti sakit a dengue.
Nupay kasta, kunana a nakasagana ti lokal a gobierno iti siudad ti Cebu a mangipaay ken mangidanon ti kasapulan dagiti maseknan nga atleta.
Mainaig iti daytoy, naragsak nga inpakaammo ni Mr. Bucsit nga arig nakikaysa ti sasaaden ti panawen kagiddan ti pannakaiyuswat ti Opening Ceremony ti naindaklan nga aktibidad ti pagilian nga indauloan ni Presidente Ferdinand Marcos Jr. gapu ta saan a nagtudo kadayta a gundaway.
Innayonna a naiget ti panang-monitor dagiti opisial ti rehion uno kadagiti amin a playing venues tapno maipasigurado nga adda iti natalged dagiti atleta ditoy probinsia.
Kabayatanna, naammoan nga agngudo ti 2024 Palarong Pambansa inton Hulio 16.
