LAOAG CITY – Nakasaganan a mausar ti Ilocos Norte Bagsakan Center.
Segun ken ni Mayor Markee Chua iti siudad ti Batac, kumpleto aminen iti pannakaestablisar ti nasao a Bagsakan Center gapu ta naiplastaren ti mausar a danum ken comfort room daytoy.
Inbatadna nga adda ti naisayangkat a panagtataripnongda iti Provincial Agriculture Office no sadinno a daytoy nga opisina ti mangimanihir iti panagoperar ti Bagsakan Center iti siudad ti Batac.
Inlawlawagna a ti nasao a Bagsakan Center ket saan laeng a nairanta para iti lokal a gobierno iti siudad ti Batac no diket mabalin pay nga akomodaren dagiti mannalon wenno kooperatiba manipud iti sabali nga ili wenno siudad ditoy probinsia.
Kunana a babaen iti daytoy ket matulungan dagiti naruay a mannalon ditoy probinsia a mailakoda dagiti produktoda kadagiti instutional buyers.
Mainaig iti daytoy, inpakaammo ni Mayor Chua nga adda ti naiyuswat a taripnong kaduana dagiti posible nga interesado a traders ken kooperatiba para iti Bagsakan Center.
Innayonna a manamnama nga adda ti maiserrek a cold storage iti mabiit iti Bagsakan Center nga isu ti pangikabilan dagiti post harvest facility dagiti mannalon.
Kabayatanna, naammoan a manamnama nga adda ti maisayangkat a dry run ti Ilocos Norte Bagsakan Center inton bulan ti Marso.
