LAOAG CITY – Mangnamnama ni Mrs. Rhona Leigh “Soya” Cheng Bueno, mangidadaulo ti Investment Office ti Provincial Government of Ilocos Norte a maiproklamar ita a tawen ti Ilocos Norte Capitol Complex nga “IT Park.”
Inlawlawagna nga iyur-urayda laengen ti kakaisuna a kurang a dokumento, ti “zoning certificate” manipud iti gobierno ditoy siudad ti Laoag.
Inbatadna nga apaman a maipasa ti nasao a dokumento iti Philippine Economic Zone Authority wenno PEZA ket maisarunon ti pannakaiproklamarna nga “IT Park.”
Segun kenkuana, dakdakkel ti oportunidad a mailako dagiti “commercial spaces” iti capitol complex kadagiti Business Process Outsourcing gapu ta masansan a ti birbirukenda ket ti “accreditation” manipud iti Philippine Economic Zone Authority.
Kunana a sumagmamano kadagiti benepisio dagiti agupa iti maibilang a Philippine Economic Zone Authority zone ket ti pannakaipaay kadakuada ti “income tax holidays” a masansan nga agpaut iti uppat a tawen.
Nupay kasta, inpakaammona a mabalin nga at-atiddog pay kadagiti lugar iti ruar ti Metro Manila a saan a maikonsiderar nga “highly urbanized city” kas ti Ilocos Norte.
Naaammoan a malaksid iti nasao nga insentibo para kadagiti agupa iti met biang dagiti agpaupa a kas ti Provincial Government of Ilocos Norte ket umadu dagiti maaddaan ti pagtrabahoan ken nayon a mapastrek manipud iti pagupa dagiti maseknan pakairamanan ti buis ti kompania ken dagiti empleado dagitoy.
Innayonna a dakkel a tulong daytoy iti panagdur-as ti maysa a lugar gapu ta ti kaadda ti Business Process Outsourcing ti mangpataud ti “ecosystem” wenno mangitunda iti agsasaruno a pannakaipasdek dagiti nagdumaduma a klase ti negosio iti aglawlaw.
