LAOAG CITY – Inpakaammo ni Mr. Cipriano Martinez III, acting General Manager ti Ilocos Norte Electric Cooperative (INEC) a ballaigi ti naiyuswat nga emergency power supply agreement signing iti GN Power Dinginin a pagangkatan ti kooperatiba ti suplay ti kuryente iti las-od ti makatawen.
Segun ken Martinez, ti nadakamat a kompaniya ket maysa kadagiti kadakkelan a power plant ditoy Pilipinas ken ilako da iti kada kilowatt ti kuryente iti P6.75, ken no saan a maladaw nga agbayad ti Ilocos Norte Electric Cooperative ket inpasigurado ti kompaniya a maikkatan pay ti sangapulo a centimo ti kada kilowatt.
Manamnama a malukatan ti bidding iti Ilocos Norte Electric Cooperative para kadagiti permanente a makikontrata.
Kabayatanna, inbatad ni Martinez a plano da a ti pagalaan ti supply ket manipod kadagiti nagduduma a suplier tapno saan a maulitti napasamak idi kallabes a maymaysa laeng ti pagalaan da a supplier.
Maipalagip a ti power supply agreement ket nangrugi laeng idi napan a bulan ti Oktubre.
