LAOAG CITY – Pinasingkedan ni P/Lt. Jennifer Sison, Administrative Office ti Ilocos Norte Highway Patrol Group a naiget ti panangmonitorda kadagiti aglaklako ti segundamano a lugan ditoy probinsia.
Segun kenkuana, sipod nga inrugida ti panangipatungpal ti surprise inspection kadagiti aglaklako ti segundamano a lugan ket awan met pay ti naduktalanda a kolorum wenno hot cars.
Inbatadna nga adda ti naiget a koordinasionda kadagiti car sell iti nagduduma nga ili ken siudad ditoy probinsia tapno maipasigurado nga awan ti tumaod a problema dagiti maseknan nga indibidual a gumatang ti segundamano a lugan.
Innayonna a nasaysayaat a makikoordinar dagiti gumatang ti segundamano a lugan iti Highway Patrol Group tapno matulungan dagitoy a mangdeterminar no ti lugan a gatangenda ket carnap wenno saan.
