LAOAG CITY – Nagtalinaed a naka-red alert ti Regional Disaster Risk Reduction and Management Council iti Rehiyon Uno gapu iti agtultuloy a consolidation ken reporting iti nagbalin nga epekto ti iduduprak ti bagyo Julian.
Daytoy ti inbatad ni Mr. Adreanne Pagsolingan, Information Officer II, Office of the Civil Defense – Region I.
Segun ken ni Pagsolingan, iti inisyal a datos da ket umaboten iti 35 a milyon a pisos ti balor dagiti nadadael iti benneg ti agrikultura iti intero a Rehiyon Uno.
Kuna na nga iti met benneg ti imprastraktura ket umab-aboten ti 739 a milyon a pisos dagiti nairekord a nadadael.
Inpalgak na a possible a manayunan pay ti balor dagiti nadadael iti biang ti agrikultura ken imprastraktura gapu ta manarimaan paylaeng ti consolidation ken reporting dagiti lokal a gobierno.
Inpakaammo na a basar iti agdama a datos da ket ti Ilocos Norte ti kaadoan ti nadadael iti agrikultura ken uray iti imprastraktura.
Mainaig iti daytoy, inrakurak ni Pagsolingan nga adda met ti nairekord da a 175 a balay a partially damaged idinto a maysa ti totally damaged, ken agarop 35 a ribo a pamilya dagiti naapektaran ti bgyo Julian iti intero a rehiyon uno.
Innayon na a kadagitoy gundaway ket awanen dagiti residente a nagtalinaed kadagiti evacuation centers nga agtultuloy latta ti panangipaay da ti tulong kadagiti naapektaran ti bagyo.
