LAOAG CITY – Kababaan ti Ilocos Norte ti “poverty incidence” kadagupan dagiti probinsia iti rehion uno.
Daytoy ket basar iti report ti Philippine Statistics Authority wenno PSA ditoy rehion uno a naiparuar idi Pebrero 22 iti agdama a tawen.
Segun iti PSA ti “poverty incidence” ket paset iti pamilia wenno populasyon nga addaan ti nababbaba a “per capita income” ngem iti “per capita poverty threshold” no maidasig iti bilang dagiti pamilia wenno populasyon.
Nakai-record ti Ilocos Norte iti 9.0 poverty incidence rate kadagupan iti populasyon iti napalabas a tawen 2021.
Mainaig iti daytoy, maymaysa ti Ilocos Norte kadagupan dagiti probinsia iti rehion uno a nakairecord ti “single digit” kalpasan a ti Ilocos Sur ket naaddaan ti 22.5 poverty incidence rate idinto a ti La Union ket 13.9 ken 23.6 iti probinsia ti Pangasinan.
Kabayatanna iti met kadagupan dagiti pamilia, kakaisuna met laeng ti Ilocos Norte kadagupan dagiti probinsia ti rehion uno a nakairecord iti single digit a 6.3.
Idi tawen 2016, ti met laeng Ilocos Norte ti kababaan ti “poverty incidence rate” iti rehion uno a naaddaan ti 15% ken idi tawen 2012, karamanen ti Ilocos Norte iti listaan ti PSA nga addaan ti “least poverty incidence”.
Iti sabali a bangir, ti Ilocos Norte ket karaman kadagiti “top quartile of provinces” a kangatoan ti HDI wenno Human Development Index sipud idi tawen 1997.
Iti nagbaetan ti tawen 2009 ken 2015, ngimmato ti HDI iti Ilocos Norte iti 12.7%.
Maibilang ditoy ti “access to knowledge” a ngimmato iti 6.4% ken ti “standard of living” iti 34.8% ken iti isu met laeng a panawen bimmaba ti “ life expectancy” iti 0.3%.
Malaksid iti daytoy, maysa ti Ilocos Norte kadagiti “1st Income Class province” ditoy pagilian.
Namantener ti gobierno probinsial iti panangidaulo ni Gob. Matthew Marcos Manotoc ti nababa nga status ti probinsia iti kinakurapay babaen iti “Capitol Express,” maysa a programa a nakasentro iti panangalay-ay ti kinakurapay a mangidanon kadagiti nadumaduma a programa ti gobierno probinsial iti agrikultura, salun-at, edukasyon, trabaho, livelihood ken dadduma pay para kadagiti kakailian.
Babaen kadagitoy a ganuat, namantener ti Ilocos Norte ti panagdur-as ti agrikultura ken turismo; maikarkarigatan a mapasayaat ti healthcare system, mapreserbar dagiti livelihoods ken mapataud dagiti pagtrabahoan babaen iti award-winning employment initiatives ti probinsia ken dadduma pay.
Impasigurado ti gobernador ti narimat a masakbayan ti tunggal maysa babaen iti ad-adda pay a panangiget na kadagiti ganuat na a m,angiyestablisar iti nataltalged ken nadurdur-as nga Ilocos Norte.
