LAOAG CITY – Saan laeng ditoy Ilocos Norte ti maim-imbestigar no diket karaman pay ti Davao City ken dadduma a lugar mainaig iti maanomalya a flood control projects.
Daytoy ti nagbalin a sungbat ti Malacañang iti pammabalaw ni dati nga Ilocos Sur Governor Chavit Singson a maipagarup a saan a makapapati ti imbestigasion ti gobierno gapu ta sumagmamano kadagiti kontratista ditoy Ilocos Norte ket konektado iti agasawa a Sarah ken Curlee Discaya.
Inbatad ni Palace Press Officer Claire Castro nga addan iti ima ti Independent Commission for Infrastructure (ICI) ti kaso ken nawaya daytoy nga agtalidtid a saan a makibiang ni Presidente Ferdinand Marcos Jr.
Inlawlawagna a manamnama nga imbestigaren met ti Independent Commission for Infrastructure dagiti dadduma pay a lugar nga adda ti kuwestionable a proyekto pakairamanan dagiti konektado ken ni Vice President Sara Duterte.
Kagiddan daytoy, kinarit ni Castro ni Singson nga ipanawagan ti panangtutok kadagiti maipagarup a “ghost projects” iti napalabas nga administrasion.
Innayonna a daytoy ket tapno saan a makuna a pumabpabor isuna iti Bise Presidente gapu ta inadmitir idin ni Singson a supsuportaranna ni Vice President Sara.
