LAOAG CITY – Immapela ni Doctor Jonathan Noble, ti presidente iti Ilocos Norte Medical Society (INMS) iti publiko a respetaren koma dagiti health workers iti baet ti mapaspasaran a krisis gapu iti covid-19.
Inaramid daytoy ni Noble kalpasan a maipagarop nga adda dagiti opisyal ti barangay a saan a nangipalubos a makasubli iti pagnanaedan dagiti health workers manipod iti trabaho da.
Daytoy ket kalpasan nga addan ti nairekord a positibo ti coronavirus ditoy Ilocos Norte.
Malaksid iti daytoy, kuna ni Doctor Noble nga adda pay ti maysa a doktor a saan a pinalubusan dagiti pulis a nangisayangkat ti checkpoint a makaawid iti pagnanaedan na iti baet nga adda ti inpakita na nga ID ken inbaga na nga aggapo iti duty na.
Inbatad pay ni Noble a basar iti pada na a doktor ket saan a nasayaat ti panagsasao ti maysa a pulis kenkuana.
Gapu iti daytoy, inbatad ni Noble a saan a nainkalintegan ti maar-aramid kadagiti health workers kangrunaan na ket isuda ti kangrunaan a maseknan tapno maagasan dagiti maapektaran ti coronavirus.
Kabayatanna, inbatad ni Doctor Liza Marie Paz-Tan nga awan ti rumbeng a pagdanagan ti publiko gapu ta adda ti sursuruten da a protocols.
Kuna na a sakbay nga agawid dagiti health workers ket adda ti protocol a masurot no kasano da nga ikkaten ti Personal Protective Equipment (PPE) da kas ti gloves, mask, inusar a bado ken abbong ti ulo.
Innayon na a saan nga amin nga agpapaay iti ospital ket adda ti direct contact da iti pasyente a positibo ti covid-19 isut gapuna a saan da a maikonsiderar a pangta ti salun-at, ngem maibilang da latta a frontliners.
Mainaig iti daytoy, inistorya pay ni Tan a dagiti health workers a mangas-asikaso kadagiti positibo ti covid-19 ket deretso nga agduty da ti makalawas ken agbakasyon da ti dua a lawas.
Iti uneg ti dua a lawas ket ag-quarantine dagiti maseknan iti uneg ti balay da tapno obserbaren da ti bagida no adda ti marikna da a sintomas ti covid-19 ken saan da a pulos makipulapol iti pamilya da.
