LAOAG CITY – Naawaten ti gobierno probinsial ti ummuna a bansada ti AstraZeneca a ginatang ti probinsia.
Daytoy ket babaen kada Gob. Matthew Marcos Manotoc, ni OIC Provincial Health Officer Dr. Josephine Ruedas ken dagiti pannakabagi ti Department of Health ditoy Ilocos Norte.
Segun iti Provincial Health Officer, tallo ribu uppat a gasut a doses ti pakpakauna a bakuna a napasangpet ti probinsia.
Malaksid iti ginatang ti probinsia ket karaman pay kadagiti bakuna a napasangpet ti probinsia ket ti AstraZeneca a para iti maikadua a dose dagiti kakailian nga umabot iti lima ribu lima gasut a doses.
Naragsak ti gobernador gapu ta malaksid iti AstraZeneca ket adda pay ti bakuna a Gamaleya ken Janssen a naipaay iti probinsia a dakkel a makatulong iti al-alisto a pannakabakuna dagiti kakailian.
Naammoan a tallo ribu a doses ti Gamaleya idinto a duapulo ket tallo ribu tallo gasut limapulo a doses ti Janssen.
Basar iti listaan ti DOH ditoy probinsia, kaaddoan ti maipaay iti siudad ti Laoag nga umabot iti uppat a ribu walo gasut pito pulo a doses ti bakuna a Janssen, sumarsaruno ti siudad ti Batac a dua ribu siam a pulo a doses, maikatlo a kaaddoan ti ili a Dingras a sanga ribu lima gasut pitopulo a doses, maikapat ti ili a Vintar a maipaayan ti sanga ribu uppat a gasut ken walopulo a doses, maikalima ti ili a San Nicolas a maipaayan ti sangaribu uppat a gasut ken duapulo a bakuna ken maikanem ti ili a Badoc a maipaayan ti sangaribu tallo gasut ken uppat a pulo a doses.
Sumarsaruno a kaaddoan ti maipaay a bakuna ti ili a Bacarra, Sarrat, Pasuquin, Pagudpud, Paoay ken Solsona.
Naammoan nga adda inyalokar ti DOH a para kadagiti amin nga ili ditoy probinsia.
