LAOAG CITY – Naagaw ti Ilocos Norte ti titulo ti Pearl Awards Best tourism oriented province ti intero a pagilian manipud iti Davao del Norte a dati a makintengngel iti nasao a pammadayaw.
Mamati ni Mr. Xavier Ruiz ti Provincial Tourism a binigbig dagiti tourism officers ti pagilian dagiti agkakapintas a programa ti probinsia iti benneg ti turismo itay napalabas a tawen 2017.
Imbatadna a karaman ditoy “summer employment program” a naipalawa pay itay napalabas kalpasan a nairaman dagiti “senior citizen” a nagserbi a tourism ambassador a nangitarayan ti probinsia kadagiti kangrunaan a kinabalubal na ti Davao del Norte a nagbalin a first runner-up ken ti Samar a 2nd runner-up gapu ta ti laeng Ilocos Norte ti addaan ti kastoy a programa iti intero a Pilipinas.
Malaksid iti daytoy, mamati ni Ruiz a nakatulong pay dagiti “legislative measures” ti probinsia kas iti “tourism code”, “investment code”, ken dagiti “cultural and natural ordinances”.
Kunana a nakagasgasat ti Ilocos Norte ta sakbay ti 2017 wenno sipud nagtugaw ni Gob. Imee Marcos ket naipasa dagiti nadakamat a paglintegan.
Inbunannagna a maysa pay a patienna a nangitarayan ti probinsia kadagiti nakalabanna ket ti kadakkel ti napastrek ti probinsia iti benneg ti turismo.
Mainaig iti daytoy, impadanon ni Ruiz ti panagyamanna iti napintas a suporta dagiti kabinbinnulig ti Provincial Tourism Office iti “tourism industry” kas kadagiti private stakeholders, dagiti front liners, tour guides, travel agencies, hotel, restaurant ken dadduma pay a maiyasping a grupo, ti academe ken dagiti local government units kangrunaanna kadagiti tourism officers.
Innayonna a ti nadakamat a pammadayaw ket saan laeng a para iti gobierno probinsial wenno ni Gob. Marcos ngem ti intero nga Ilocos Norte.
