LAOAG CITY – Inpakaammo ti Provincial Veterinarian a ni Dr. Loida Valenzuela nga awanen iti kaso a bird flu iti Ilocos Norte.
Segun ken ni Valenzuela, naawat da laeng iti kallabes ti deklarasyon a ti probinsya ket maibilangen kas bird flu free babaen iti gobierno national.
Inbatad ni Valenzuela a dagiti ili a nakairekord ti bird flu ket iti ili ti Baccara, Carrasi, Piddig, Vintar, Burgos, Bangui ken iti ciudad ti Laoag ken Batac.
Nupay kasta, inpasingked ni Valenzuela nga itultuloy da latta ti naiget a panagmonitor da ditoy probinsia no sadinno a mangisaysayangkat da iti surveillance kadagiti addaan iti farm na tapno masigurado nga agtalinaed a bird flu free iti Ilocos Norte.
Mainaig iti daytoy, binalakadan ni Valenzuela iti publiko a kanayon a monitoren dagiti taraken a manok tapno saan a maapektaran ti nasao a sakit gapu ta dalikado daytoy.
