LAOAG CITY – Umaboten ti 100 a kaso ti covid-19 ti naimaldit ti probinsya nga Ilocos Norte.
Iti statement nga inparuk-at ni Gov. Matthew Marcos Manotoc, ti maika-100 a kaso wenno ni IN-C100 ket agtawen ti 39 manipud Barangay 18 iti ili ti Piddig.
Maysa daytoy nga APOR a kameng ti PNP ken awan ti travel history na.
Dimmalan iti swab testing kas requirement iti trabaho na no sadinno ket positibo ti nagbalin a resulta na.
Saan met pay a madeterminar no siasinno ti posible a nakaalaan na iti nasao a virus, ken iti agdama ket naka-quarantine daytoy.
Basar iti datos ti gobierno probinsyal, manipud iti naimaldit a 100 a kaso ket 37 ti active, 62 ti nalaingan ken maysa ti pimmusay.
