LAOAG CITY – Umaboten iti 18 nga aso ti nagpositibo iti rabies ditoy Ilocos Norte sipud idi bulan ti Enero agingga iti Marso 31.
Daytoy ti inpakaammo ni Dr. Lito Ramiro manipud ti Provincial Veterinary Office.
Inlawlawagna a 23 dagiti ulo ti aso a naipaeksamen ngem nagnegatibo ti lima.
Kunana a dagiti nagpositibo ket manipud iti dua a siudad ken innem nga ili ditoy probinsia.
Inbunannagna a kaaddoan iti Siudad ti Batac a dimmanon iti walo a kaaddoan iti nagpositibo, tallo iti Paoay, dua iti Bacarra ken Laoag City , saggaysa met iti ili ti Badoc, Piddig ken Nueva Era.
Mainaig iti daytoy, inbatadna a naiget ti pammilin ni Gob. Matthew Marcos Manotoc a tumulong ti Provincial Veterinary Office a mangisayangkat ti panagbakuna kadagiti nagdumaduma nga ili kangrunaanna kadagiti adda dagiti nagpositibo iti rabies.
Inpakaammona a naisayangkat metten ti massive vaccination iti Siudad ti Batac ken agturturong payen kadagiti barbarangay dagiti pannakabagi ti City Veterinary Office ken tumultulong ti Provincial Veterinary Office iti daytoy a ganuat.
Segun ken ni Ramiro, maisaysayangkat ti pannakaiyammo kadagiti kakailian no ania dagiti rumbeng nga aramiden no makagat iti aso ken kangrunaanna iti pannakaipagunamgunam kadagiti adda ti tarakenna nga aso ti panangtaripatoda a naimbag kadagitoy.
Innayonna nga adda ti umdas nga anti-rabies vaccine gapu ta agtitinnulong a mangipaay ti gobierno probinsial, regional office ti Department of Agriculture ken ti maseknan a Local Government Unit.
