LAOAG CITY – Nakairekord manen ti probinsya nga Ilocos Norte ti 93 a baro a kaso ti covid-19.
Basar iti case bulletin nga inparuk-at ti gobierno probinsyal idi rabii, ditoy siudad ti Laoag ti nakairekord ti kangatoan a kaso nga umabot iti 54.
Sumaruno ditoy iti ili Dingras nga addaan ti 21 a baro a kaso idinto nga innem ti nairekord iti siudad ti Batac, uppat iti ili ti San Nicolas, tallo iti ili ti Bacarra, dua iti ili Sarrat ken agpada a saggaysa ti baro a kaso iti ili Paoay ken Pagudpud.
Kabayatanna, ti pimmusay ket pasyente manipod iti ili Bangui.
Malaksid kadagiti nagpositibo ken natay ket adda met ti nairekord ti probinsya a nalaingan manipod iti virus ken umabot iti 54.
Addan ti pakabuklan a 5,984 ti nairekord ti probinsya a kaso ti covid-19 manipod nangrugi ti pandemiya.
Manipod iti nasao a bilang ket 1,622 ti aktibo a kaso idinto a 4,218 dagiti nalaingan ken 104 ti death case.