LAOAG CITY – Inaprobaran ti Sangguniang Panlalawigan ti maysa a resolusion para iti pannakaideklara ti State of Calamity iti intero a probinsia ti Ilocos Norte gapu iti iduduprak ti Super Typhoon Carina.
Segun ken ni Sangguniang Panlalawigan Member Franklin Respicio, naipasa iti maikadua ken maudi a pannakaibasana ti nasao a resolusion tapno naan-anay a maiparuk-at ti calamity fund ken matulungan dagiti nakaro a naapektaran ti nasao a bagyo.
Inbatadna a dumanonen iti nasurok maysa a bilyon a pisos ti balor dagiti nadadael iti benneg ti agrikultura ken imprastraktura ken dadduma pay.
Mainaig iti daytoy, inpakaammo ni Engr. Randy Nicolas, ti pannakabagi ti Provincial Disaster Risk Reducation and Management Office nga adda ti sumurok-kumurang 700 a milyon a pisos ti balor ti nadadael iti benneg ti imprastraktura, sumurok-kumurang 15 a milyon a pisos met iti agrikultura idinto a nakairekord ti nasurok 300 a milyon a pisos ti Department of Public Works and Highways 1st ken 2nd District Engineering Office, Provincial Engineering Office ken National Irrigation Administration.
Inlawlawagna nga adda ti 3,288 a pamilia a bukbuklen ti 10,852 nga indibidual ti naapektaran iti isasaplit ti Super Typhoon Carina.
Innayonna nga adda ti 23 a pagtaengan ti partially damaged ken dua ti naimaldit a napasamak a landslide.
Kabayatanna, bayat a maisursurat daytoy a damag ket saan pay a napirmaan ni Gov. Matthew Marcos Manotoc ti inaprobaran a resolusion ti hunta probinsial.
