LAOAG CITY – Inbatad ni Doctor Norman Rabago, ti Covid-19 consultant ditoy probinsya a nakasagana dan para iti pannakaiyuswat ti 3-Day National Vaccination Drive iti intero a pagilyan.
Daytoy ket maiyuswat intono Nobyembre 29 agingga iti Disyembre 1 ita a tawen.
Inlawlawag ni Rabago a ti 3-day Vaccination Drive ket maiyuswat amin kadagiti vaccination centers ditoy probinsya.
Kuna na a ti kangrunaan a maiprayoridad ket dagiti nataengan a saan pay a pulos a nabakunaan ken dagiti agtawen ti 12 agingga iti 17.
Inpakaammo ni Doctor Rabago a dagiti agtawen ti 12 agingga iti 17 ket mabalin da ti mapan agpalista iti aniaman nga oras ken aldaw iti Rural Health Unit (RHU) wenno aniaman a kayat da a pagpabakunaan.
Innayon na nga intono kaaldawan ti panagbakuna da ket masapol a bayabayen ken adda ti pammalubos ti nagannak da.
Segun pay ken ni Rabago, no saan a masango dagiti nagannak ket mabalin met a ti kapitan iti barangay da ti mangkuyug wenno mangted ti pammalubos iti pannakabakuna dagiti agtawen ti 12 agingga iti 17.
Mainaig iti daytoy, inbatad ni Doctor Rabago a ti target da a mabakunaan iti uneg ti tallo nga aldaw ket 100 a ribo nga indibidual ditoy probinsya.
Iti agdama ket adon dagiti napasangpet da a suplay ti bakuna kontra iti covid-19.
