LAOAG CITY – Inpakaammo ni P/Maj Kristian Lee Badua, mangibagbagi ti Ilocos Norte Police Provincial Office (INPPO) nga adda iti panagbaliw ti duty-da gapu iti kinabara iti panawen.
Inbatadna a strikto ti panang-monitorda babaen ti medical unit kadagiti amin a Philippine National Police (PNP) kangrunaan kadagiti naka-duty iti ruar.
Mainaig iti daytoy, kinunana a no adda dagiti aktibidad a kasapolan ti presensiada ket agbalin a tallo a shifting ti panagduty-da tapno masigurado ti kinatalged dagitoy.
Innayonna pay nga adda dagiti nakabantay ti protect box ket mabalinda ti rumuar ngem saanda a mabalin nga umadayo iti puesto a pagbanbantayanda.
Kabayatanna, kinunana nga iti baet ti kinabara ti panawen ket rumbeng a ma-monitor ken makita dagitoy tapno masigurado ti kinatalged iti tunggal maysa.
