LAOAG CITY – Indeklarar ti Philippine Drug Enforcement Agency (PDEA) ti Ilocos Norte Police Provincial Office (INPPO),Camp Valentin S Juan a masarakan iti Barangay 23, San Matias ditoy ciudad ti Laoag kas Drug free workplace wenno drug free camp.
Daytoy ti inpakaammo ni Provincial Director Police Col. Julius Suriben kabayatan ti naiyuswat a press conference iti PNP ditoy ciudad ti Laoag.
Segun ken ni Suriben, naiyuswat ti surprise drug test kadagiti 549 nga headquarters personnel a pakairamanan ti Support units kas ti CIDG, PNP-SAF, Crime Lab, RMFB, Maneuver Force Company ken HPG no sadinno a negatibo amin ti resulta da.
Inpakaammo na a mismo a ti Provincial Director ti PDEA ditoy probinsya a ni Intelligence Agent Rey Garnel Bagate ti nangideklarar a drug free camp iti Ilocos Norte Police Provincial Office (INPPO), Camp Valentin S Juan.
Innayon na a ti nasao nga addang ket paset ti agtultuloy a programa da tapno masigurado nga amin a kameng ti pulisya ditoy probinsya ket drug free ken saan a maikkat ti panagtalek dagiti umili no agisayangkat da ti operasyon kontra iti illegal a droga.
Mainaig iti daytoy, inpalgak ni Suriben nga adda dagiti nakasarsarita na a sumagmamano a mayor iti Ilocos Norte no sadinno nga inkari da nga iyaplikar da met ti drug free workers iti Local Government Unit (LGU) ken municipal police stations iti intero a probinsya.
