LAOAG CITY – Naan-anayen a nakasagana ti Ilocos Norte Police Provincial Office iti iduduprak ti bagyo Uwan.
Daytoy ti inpasigurado ni Police Lt. Col. Ryan Retotar, ti mangidadaulo iti Deputy Provincial Director for Operation iti Ilocos Norte Police Provincial Office.
Kuna na nga apaman a nakastrek ti bagyo Uwan iti Philippine Area of Responsibility ket dagus a na-activate ti Search and Rescue Team ti Philippine National Police.
Immuna iti daytoy, nagturong dagiti kameng ti pulisya kadagiti nagduduma a barangay ken kinasarita da dagiti opisyal kangrunaan na dagiti kakapitan para iti nasapsapa a pannakaibakwit dagiti residente nga agnanaed kadagiti narisgo a lugar, partikular dagiti masansan a malayos ken pakapasamakan ti landslides.
Kabayatanna, inbatad ni Police Lt. Col. Jephre Taccad, ti mangidadaulo iti Provincial Operation Management Unit a naipagagangayen a no adda ti mapasaran a kalamidad kas ti bagyo ket naiget a maipatungpal ti liquor ban ditoy probinsya tapno maliklikan ti aniaman a disgrasya wenno possible a pannakairisgo ti biag.
