LAOAG CITY – Nakagun-od ti Ilocos Norte Provincial Library ti naruay a pammadayaw itay napalabas a tawen 2025.
Daytoy ti inpakaammo ni Mr. Eric Coloma, provincial librarian kabayatan ti kaunaan a pannakitaripnong ni Gob. Cecilia Araneta Marcos kadagiti department heads ita a tawen 2026.
Inlawlawagna a maibilang ditoy ti inpaay ti National Commission for Culture and the Arts wenno NCCA a “silver recognition” ti “entry” ti INPL iti “2025 Photovoice Project” a paset ti “Library and Information Services Month” idi Nobiembre.
Malaksid iti daytoy, naiyalat pay ti “library” ti probinsia ti “Best Participating Institution” kabayatan ti “2025 LIS Month” ken iti “National Bookweek celebration”.
Nagun-ud met ni Miss Hazel Villegas ti maikadua a puesto iti “The Life of a Librarian Category” kabayatan ti 2025 National Bookweek celebration.
Naammoan a napadayawan pay ni Coloma nga “Outstanding Librarian” idi bulan ti Oktubre babaen iti Philippine Librarians Association Inc.-Ilocos region Council.
