LAOAG CITY – Maidiaya a libre ti bakuna kontra iti “Human papillomavirus” kadagiti ubbing a babbai nga agtawen iti 9 agingga iti 14.
Inlawlawag ni Dr. Medeldorf Gaoat, Chairman ti Committee on Health ti Sangguniang Panlalawigan a babaen iti daytoy ket awanton ti problema ditoy pagilian mainaig iti cervical cancer.
Mainaig iti daytoy, inbatadna a kalikagum ti Provincial Government of Ilocos Norte iti liderato ni Gob. Matthew Marcos Manotoc ken ti sibubukel nga hunta probinsial nga idadauloan ni Bise Gob. Cecilia Marcos a mabakunaan amin nga ubbing a babbai ditoy probinsia nga agtawen iti 9 agingga iti 14.
Mamati a babaen iti napintas a panagbibinnulig ti Department of Health, Provincial Government of Ilocos Norte, dagiti pribado a sektor ken dagiti nagannak ket matun-uyan ti sanga gasut a porsiento a pannakabakuna dagiti maseknan nga ubbing a babbai.
Kunana nga iti biang ti gobierno probinsial, addan ti impasa ti Sangguniang Panlalawigan a resolusion a mangpatalged iti kinapudno ti tarigagay dagitoy a tumulong tapno matun-uyan ti pannakabakuna amin dagiti maseknan nga ubbing a babbai.
Innayonna a kalikagum ni Gob. Manotoc a kalpasan ti panagbalin ti Banna a kaunaan nga ili iti intero a pagilian a nakabakuna iti 90 a porsiento kadagiti maseknan nga ubbing ket agbalin met ti Ilocos Norte a kaunaan a probinsia iti intero a pagilian a makabakuna iti 100 a porsiento.
