LAOAG CITY – Makumikom ti Ilocos Norte Tourism Office iti panagsagsaganada para kadagiti programa ken aktibidad ti Semana Santa.
Segun ken ni Mr. Xavier Ruiz, ti Officer In Charge iti nasao a pangopisinaan, gundawayanda ti panangbukel kadagiti aktibidad tunggal peak season kas ti Semana Santa gapu ta kadagitoy a panawen a maob-obserbaranda a ngumato ti bilang dagiti turista.
Inbatadna a manarimaanen ti pannakaisagana dagiti heritage churches ditoy probinsia kas kangrunaan a pagturturungan dagiti bisita kas paset ti bisita iglesia.
Kunana nga adda ti maiyuswat a libot wenno procession dagiti nagduduma nga ili kas iti ili ti Pasuquin, Bacarra, Badoc, iti siudad ti Batac ken ditoy siudad ti Laoag.
Inlawlawagna a no kastoy nga aktibidad ket adda dagiti makipaset a cultural enthusiast gapu ta kalikagumda nga imatangan dagiti dadduma a century old religious images a masarakan ditoy Ilocos Norte.
Mainaig iti daytoy, kuna ni Ruiz nga adda pay ti maisayangkat a Black Saturday Concert no sadino a maitampok dagiti local bands ngem iti daytoy a tawen ket maisayangkat daytoy iti Saud Beach iti ili ti Pagudpud.
Inpasiguradona nga iti sumarsaruno nga aldaw ket maipublikar iti pakabuklan a listaan dagiti aktibidad iti umay a Semana Santa.
Kabayatanna, naammoan a dagiti nasao a programa ket pagbibinnuligan ti Ilocos Norte Tourism Office ken dagiti simbaan katolika.
