LAOAG CITY – Inpakaammo ni Imam Taher Arib ti Ilocos Norte United Muslim Association dagiti tradision a maiyus-uswat babaen ti Ramadan ita a bulan.
Segun kenkuana, naiyuswat ita nga aldaw ti Tarawih no sadino daytoy ti sagrado a panagkararag dagiti Muslim ken ni Allah.
Inbatadna nga ita nga aldaw ket maangay ti Isha a sabali pay a wagas ti panagkararagda ken ti Iftar ket ditoy nga agtitiponda a mangan iti rabii.
Mainaig iti daytoy, inlawlawagna nga adda dagiti aw-awaganda a sawm wenno fasting no sadino saanda a mabalin a mangan manipod parbangon aggingga lumnek ti init idinto nga adda pay ti panagkararagda ken panagbasa ti Quran.
Malaksid iti daytoy, naammoan a manarimaan ti panagdalosda iti Mosque babaen ti pammatida a dagiti anghel ket sumrekda iti uneg ti Mosque.
Innayonnna a ti laeng mabalinda nga ipauneg a taraon ita a Ramadan ket dagiti halal kas ti prutas ken liklikanda dagiti haram kas ti pork-related products, alcohol ken panagsugal ken dadduma pay.
Kabayatanna, ita nga aldaw pormal a nangrugi ti pannakaselebrar ti Ramadan nga agpaot iti uneg ti 30 nga aldaw.
