LAOAG CITY – Pormalen a nalukatan ti baro a lugar a nakaestablisaran ti Ilocos Norte Water Park iti asideg ti La Virgen Milagrosa Cove iti ili ti Badoc a dati a masarakan iti Paoay Lake.
Daytoy ket kas paset ti panagsagsagana ti gobierno probinsial ti Ilocos Norte iti babaen ti Ilocos Norte Tourism Office iti iyaasidegen ti “summer season” wenno panawen ti kalgaw.
Naammoan a maidiaya ti dua nga oras nga inflatable play pass iti 279 a pisos, 319 a pisos para iti uppat nga oras idinto a 399 a pisos para iti walo nga oras nga inflatable play pass para kadagiti umili ti Ilocos Norte basar iti naamendaran nga ordinansa ti probinsia.
Nailanad pay iti nasao nga ordinansa ti probinsia a ti pagbayad dagiti turista para iti dua nga oras ket 319 a pisos, 399 para iti uppat nga oras ken 479 a pisos para iti walo nga oras.
Maibilang daytoy a nalaklaka no maidasig iti pagbayad iti kallabes a 399 a pisos ti pagbayad iti uneg ti dua nga oras, 499 a pisos para iti kagudua ti aldaw ken 699 a pisos iti agmalem nga inflatable play pass.
Kabayatanna, mabalin dagiti interesado a mapan agay-ayam iti waterpark ti nasapa nga agpa-book babaen iti panag-text wenno panagtawag iti 0908-810-8626 wenno ag-message laeng iti Ilocos Norte Tourism page.
