LAOAG CITY – Inrakurak ni Dr. Paula Paz Sydiongco, Director IV ti Ilocos Center for Health Development a ti Ilocos Region ket karaman iti Top 5 Regions iti intero a pagilian nga addaan ti kangatoan a road traffic incidents.
Segun kenkuana, basar iti datos ti Philippine National Police ket adda ti panagngato ti bilang dagiti mairekrekord a desgrasia iti rehion uno.
Inbatadna nga idi tawen 2023 ket adda ti 3,153 ti nairekord a napasamak a desgrasia idinto a 3,300 idi tawen 2024.
Kunana nga idi tawen 2023 ket adda ti 1,443 ti nairekord a nasugatan gapu iti desgrasia idinto a 821 idi tawen 2024.
Inlawlawagna nga idi tawen 2023 ket adda ti 392 ti nairekord a natay gapu iti desgrasia idinto a 1,094 idi tawen 2024.
Mainaig iti daytoy, maladingitan ni Dr. Angelito Umali, Health Officer ti Health and Nutrition Section of UNICEF Philippines kalpasan nga adda dagiti ubbing wenno agtutubo a mairamraman kadagiti nakaam-ames a desgrasia.
Gapu iti daytoy, inpettengna a masapul ti naig-iget a panangipatungpalda kadagiti programa ken adbokasia para kadagitoy kas ti pannakaisuro kadakuada ti kinatalged iti kalsada ken dagiti karebbengan dagiti ubbing wenno agtutubo nga agtawen ti lima agingga iti 19.
Kabayatanna, balligi ti pannakaisayangkat ti Road Safety Month Activity a nagbinnuligan ti Mariano Marcos Memorial Hospital and Medical Center ken ti Department of Health – Ilocos Center for Health Development iti ili ti Banna.
