LAOAG CITY – Naragsak nga inpakaammo ni Mr. Cesar Bucsit, Department of Education Regional Administrative Officer V ti Region 1 Spokesperson nga adda ti tallo a gold medals ken maysa a silver medal ti Region 1 wenno ti Ilocos Region iti agtultuloy a 2024 Palarong Pambansa idiay Cebu City.
Segun kenkuana, dagiti nakagun-od ti balitok a medalya ket isuda Irish Angel Linicudan iti archery girls, Jimmuel James Espiritu iti archery boys ken ni Ariana Dawn Rabi discus throw idinto ti nakaala ti silver medal ket ni Anton Paulo Delia iti 400-meter iti swimming event.
Inbatadna nga adu pay dagiti sporting events a pagbibinnalubalan dagiti umaayam isu a dakkel ti tsansana a makamakam pay ti Ilocos Region iti naindaklan nga aktibidad.
Kunana nga adda amin ti representatives kadagiti nagdudma a tay-ak ti ay-ayam no sadino adda iti 26 nga sporting events iti secondary level idinto a 19 iti biang ti elementary level.
Mainaig iti daytoy, makita ni Mr. Bucsit ti gagar dagiti amin nga atleta nga agkalikagum a makagun-od ti medalya a pakidayawan saan laeng ditoy probinsia no di ket iti intero a rehion uno.
Kabayatanna, naammoan nga agtultuloy ti pannakamonitor kadagiti amin nga atleta, coaches ken technical officials tapno maipasigurado a natalged met laeng dagitoy kabayatan ti pannakaiyuswat kadagiti nagduduma nga sporting events.
