LAOAG CITY – Nagpanawagan ni Aljon Medrano, ti Ilocos Youth and Students Alliance Against Corruption ti transparency iti panangilatang ti pundo para iti edukasion.
Segun kenkuana, ti pananggastos ti pundo ket nasken a saan nga ilimlimed ken masapul a saan a makalkaluban ti kinapudno.
Inbatadna a ti laban kontra iti korapsion ket maysa a laban para iti masakbayan.
Inlawlawagna a ti korapsion ti mangparparigat kadagiti minilyon a Pilipino a ti kangrunaan a maap-apektaran ket dagiti agtutubo.
Kunana a ti pundo a naikeddeng para iti edukasion ket saan a mailatlatang iti husto a pakaipapananna no diket insigida nga ibulsa dagiti kurakot banag a naiget a konkontraenda.
Innayonna a masapul a saan a maisalakan dagiti amin a karaman iti panagtakaw iti kuarta ti tattao uray kasano ti kinangato ti posision dagitoy.
Kabayatanna, inpetteng ni Pastor Bruce Belmonte ti United Church of the Philippines a makikaykaysada kadagiti panawagan ti naruay a Pilipino a masapul a mapagsungbat dagiti amin a karaman iti korapsion tapno naan-anay a magun-od ti hustisia.
