LAOAG CITY – Maibilang a multi-awarded iti Suiseki Stone Competition iti intero a pagilian a Pilipinas ti maysa nga Ilokano a ni Mr. Elizon Castillo a taga ili ti Pasuquin.
Segun kenkuana, nangrugi isuna nga agkolektar kadagiti nagduduma a klase ti batbato idi tawen 2018.
Inbatadna nga idi 2019 agingga iti agdama a tawen ket nakisalip isuna iti nasao a kompetision idiay Manila ken Quezon City no sadinno a nagkampeon daytoy.
Inlawlawagna a nangina dagiti ilaklakona a naidumduma a klase ti batbato nga aggapu kadagiti bantay ken baybay ditoy probinsia.
Inpettengna a ti kapintasan a mapanda agbirok kadagiti naisangsangayan a klase ti batbato ket no agtudtudo wenno kalpasan nga adda ti dimmuprak a bagyo gapu ta ditoy a makitada dagiti batbato a naiyanud iti karayan.
Inpakaammona nga adda ti nagduduma a klase ti batbato nga al-alaenda pakairamanan ti landscape, figure, abstract ken pattern.
Inpannakkelna a babaen iti daytoy ket dimmur-as ti panagbiag iti pamiliana ken nakagatangen ti kotse.
Kalikagumna a maitandudo dagiti suiseki stone nga adda kenkuana iti ballasiw taaw.
Kunana a nangbukelda ti grupo nga addaan ti 14 a miembro para iti pannakaipatakder ti pasdek a pangikabilan wenno pakabuyaan dagiti suiseki stone dagitoy.
Innayonna nga ilaklakona pay dagiti suiseki stone-na babaen ti online no sadinno nga adu dagiti gumatang kenkuana nangruna kadagiti gangganaet.
Patien dagiti Hapon a ti nasao a bato ket napigsa ti guyodna ti gasat ken duronna ti malas iti biag ti maysa a tao.
Mainaig iti daytoy, dagiti nasao a bato ket nguminngina bayat a bumaybayag wenno agbalin a daan.
Naammoan a sakbay a simrek iti kastoy a negosio ni Castillo ket dati daytoy nga agkalkalap ken agtaltalon.
Kabayatanna, saan a mamati ni Castillo ti pagsasao a kuarta la ngaruden nagbalin pay a bato gapu ta para kenkuana ti bato ket mabalin nga agbalin a kuarta.
