LAOAG CITY – Inpakaamo ni Bombo International News Correpondent Clarissa Colcol iti Amman, Jordan ngem tubo iti ili ti Solsona a nagpositibo daytoy iti covid-19.
Segun ken ni Colcol negatibo ti immuna a resulta ti swab test na.
Nu pay kasta, kuna na nga iti maikadwa ken maikatlo nga idadalan na ti swab test ket dita a nagpositibo iti virus.
Immuna iti daytoy, inlawlawag ni Colcol a nabakunaan iti covid-19 vaccine ti amo na a lakay ngem kalpasan ti tallo nga aldaw ket kimmapsot ti pusona rason a nagtalinaed iti ospital ti maysa a lawas.
Inbatad na a bayat nga adda iti ospital ti lakay ket ti anak ken ti asawa daytoy ti nagbanbantay ken isu metten ti maipagarup a nakaakaran na ti virus.
Gapu iti daytoy, kuna nga nga uppat da amin iti pagpapaayan na a pamilya a nagpositibo ti covid-19.
Kabayatanna, inpakaamo ni Colcol a dua nga aldaw a nagtalinaed iti ospital manipod nagpositibo iti virus idi Enero 30 ngem nagawid metlaeng iti pagtaenganna dagiti amo na para iti pannakaileppas ti panagquarantine na.
