LAOAG CITY – Kalikagum ti network ti digital advocates a Digital Pinoys a maimbestigaran ti maipagarup a saan nga otorisado a panang-access ti files ken panangala ni Batangas 1st District Representative Leandro Leviste kadagiti dokumento manipud iti Department of Public Works and Highways (DPWH).
Inbatad ni Digital Pinoys National Campaigner Ronald Gustillo, seryoso daytoy a banag nangruna ket rumrummuar a pinilit ti kongresista nga alaen dagiti dokumento manipud iti opisina ti dati nga opisial ti Department of Public Works and Highways a ni Usec. Catalina Cabral.
Inlawlawagna nga adda ti maipatpatungpal a lehitimo a mekanismo para iti whistleblowing ken oversight tapno masigurado nga agtalinaed a credible ti aniaman nga ebidensia.
Gapu iti inaramid ni Leviste, ti integridad ti impormasion a naala nga usaren nga ebidensia ket posible a saan a pumasa iti legal proceedings.
Inpettengna a ti panangitandudo ti transparency ken accountability ket nasken a kanayon a maibasar iti linteg, due process ken digital governance.
Maipalagip nga inrakurak ni Leviste nga adda ti pammalubos ni Department of Public Works and Highways Sec. Vince Dizon iti panangalana ti files iti opisina ni Cabral banag a naiget met a naglikudan ti sekretario ti nasao nga ahensia.
