LAOAG CITY – Inrakurak ti Commission on Elections (Comelec) a nalpasen ti imbestigasyon iti maipagarop a saan a panangideklarar ni Senador Rodante Marcoleta ti sumagmamano nga election donors iti Statement of Contributions and Expenditures (SOCE) na iti napalabas nga eleksyon idi Mayo 2025.
Segun ken ni Comelec Chairman George Erwin Garcia, nalpasen ti Political Finance and Affairs Department (PFAD) ti panangtingiting ken nakasaganan a mangiparuk-at ti resolusyon.
Iti counter-affidavit, inpetteng ni Marcoleta a dagiti donasyon ket naipaay sakbay pay nga indeklarar na nga agkandidato, maiyataday iti desisyon ti Korte Suprema iti kaso a Penera vs. Comelec, a mangibagbaga a maibilang laeng a kandidato ti maysa nga aspirant iti umuna nga aldaw ti campaign period.
Maipalagip nga idi Nobyembre 2025, nangiparuk-at ti Comelec ti show cause order mainaig iti maipagarop a saan a kumpleto ti indeklarar na a donors ken iti maibagbaga a discrepancy iti nagbaetan ti Statement of Contributions and Expenditures ken Statement of Assets, Liabilities and Network (SALN).
Immunan nga inadmitir ti senador a saanna nga inraman ti sumagmamano a kontribusyon gapu ta kiniddaw dagiti donors a saandan a mabigbig pay.
Iti Statement of Contributions and Expenditures ni Marcoleta, nailanad a nakagastos ti P139.9 milyon iti kampanya, nangatngato ngem ti indeklarar na a net worth a P51.9 milyon, ken zero donations.
