LAOAG CITY – Nalpasen ti Forensic Group ti Philippine National Police (PNP) ti imbestigasyon iti pammaltog iti Senado idi Mayo 13, ken naisumitir dan dagiti nagbalin a duktal da iti PNP-Criminal Investigation and Detection Group (PNP-CIDG).
Segun ken ni PNP Forensic Group Director Col. Pierre Paul Carpio, agtugma amin ti anggulo iti lugar ti krimen kasta met ti matching ti nagduduma nga ebidensiya.
Inpakita pay ti opisyal ti 3D scanning a naisayangkat idi kangitingitan ti insidente ken ti trajectory wenno direksyon dagiti bala iti hallway.
Basar iti daytoy, amin a buttaw a tinamaan ti bala ket naggapo kadagiti gunshot a nairekord a mismo iti uneg ti pasdek.
Iti panangitingiting iti crime scene, nagusar ti grupo ti “blue box” tapno ipakita ti pakabuklan ti nakapasamakan ti krimen ken no kasanu nga inpatungpal ti Scene of the Crime Operations (SOCO).
Immunan nga inparuk-at ti CIDG ti maysa a CCTV footage a mangipakpakita a ni suspended Senate Sergeant-at-Arms Mao Aplasca ti immuna a nagpaputok ti paltog, a rason ti simmubbutan ti kameng ti National Bureau of Investigation (NBI).
Sumagmamano nga oras kalpasan ti riribok, pimmanaw iti premises ti Senado ni Senador Ronald “Bato” dela Rosa, no sadinno a temporaryo a nagpakustodiya iti baet ti sangsangwen na nga arrest warrant manipod iti International Criminal Court (ICC).
