LAOAG CITY – Manganamnama ni Mrs. Josephine Calajate, ti Provincial Treasurer nga adda ti pagdur-asan ti imbestigasyon iti mapukpukaw nga agarup P84-million a kwarta ti local a gobierno ditoy siudad ti Laoag.
Daytoy ket kalpasan a nalukatan ti City Treasury Office para iti inspeksyon.
Kuna ni Calajate a naduktalan iti uneg ti opisina ti dati a treasurer a ni Mrs. Elena Asuncion dagiti nagduduma a kahon a naglaon ti records, passbooks, tseke ken dadduma pay nga adda ti pakainagan na iti transaksyon ti kwarta.
Inbatad na a babaen dagiti naukagan da a dokumento ket matulungan ti Commission on Audit iti imbestigasyon.
Maipalagip a ti dati a treasurer ti siudad a ni Asuncion ti maitudtudo a rason ti panagpukaw ti agarup P84-million a kwarta ti siudad.
Nagpukaw ni Asuncion idi 2016 ken agpapan ita ket saan pay a masisinunuo ti lugar ti dati a treasurer.
