LAOAG CITY – Inpetteng ni Surigao del Norte 2nd District Representative Ace Barbers a saan a sinophobia ken racism ti panggep ti Kamara de Representantes iti iyus-uswat da nga imbestigasyon mainaig iti panagado ti Chinese students iti pagilian.
Segun ken ni Barbers, awan ti rumbeng a pagdanagan ti Filipino-Chinese community iti Pilipinas iti iyus-uswat nga imbestigasyon ti Kamara de representants gapu ta nagtalinaed a silulukat ti Pilipinas para kadagiti gangannaet a legal a nagturong iti pagilian.
Rakurak daytoy ni Barbers mainaig iti nadakamat ti civic leader a ni Teresita Ang See a maaw-awagan a Sinophobia ken racism ti naireport a panagimbestigar iti panagado dagiti Chinese student kadagiti lugar nga ayan dagiti Enhanced Defense Cooperation Agreement (EDCA) sites.
Nagtalinaed ti takder ni Barbers a masapol a bantayan a mismo ti Chinese community dagiti kakadwa da gapu ta sumagmamano kadagitoy ket adda ti pannakainaig da kadagiti illegal nga aktibidad.
Uray ni Department of Interior and Local Government (DILG) Secretary Benhur Abalos Jr. ket kinanunungan na ni Barbers ken inpetteng na a saan amin a gangannaet ket nabara ti panangawat kadakuada ti Pilipinas agingga a lehitimo ti gagem da iti pagilian.
Innayon na a kasapulan pay a maamoan ti eksakto a bilang dagiti Chinese national a naka-enroll iti Cagayan gapu ta agduduma ti datos ti nagduduma nga ahensya.
