LAOAG CITY – Masapul nga ipakita dagiti mangidadaulo nangruna ken ni Pres. Ferdinnad Marcos Jr. a naidumduma ti administrasyon ita ngem iti naglabas nga administrasyon.
Daytoy ti inbatad ni Atty. Dominggo “Egon” Cayosa – Former President ti Integrated Bar of the Philippines, kagiddan ti agtultuloy nga inbestigasyon ti Senado ken ni dismissed Mayor Bamban, Tarlac Alice Guo.
Segun ken Cayosa, napintas a naisublin ti hearing kontra ken ni Guo gapu ta naruay pay dagiti masapul a maamwan ken masungbatan a saludsod.
Inpettengna a gundawayan kuman daytoy ti gobierno.
Kunana a masapul nga ipakita ti Presidente nga adda political will na iti inbestigasyon, nangruna iti biang ti Senado tapno makabukel da ti naigiget, napinpintas ken umno a linteg seknan iti pannaka-iparit ti illegal nga operasyon ti Philippine Offshore Gaming Operators.
Inpablaakna pay a no matakuatan nga agtaktakem iti gobierno dagiti mangtultulong ken Guo ket ikkaten a dagus ti Presidente a kas iti inaramid na ken ni Bureau of Immigration Commissioner Norman Tansingco.
Innayon ni Cayosa a no adda interrogation skills ti Senado ket saan a posible a maibutaktak ni Guo no siasinno dagiti nangtulong kenkuana.
Inpettengna pay a masapul nga agsasarita dagiti Senador nangruna no maipapan kadagiti damag da ken Guo tapno saan a maul-ulit ken awan ti kaipapanan na.
Daytoy ket kalpasan a naobserbaran ti abogado nga adda dagiti sumangmamano a Senador nga adda laeng iti hearing gapu ta kayatda ti agparang iti camera.
Binallaagan pay ni Cayosa ti gobierno ken dagiti amin nga agim-imbestigar maipapan iti kaso ni Guo a kalkalen da dagiti amin a posiblidad a pakainaigan ni Guo, kas kuma dagiti pagayam na, business partners, transaksyon na iti banko ken dadduma pay.
Pinasingkedan pay ni Cayosa a saan a legal ti rason ni Guo a mabuteng a matay isuna isu a saanna a sungbatan a nasayaat dagiti saludsod kenkuana.
