LAOAG CITY – Inrakurak ni Manila 3rd District Rep. Joel Chua a posible a makatulong pay iti 2028 presidential bid ni Vice President Sara Duterte ti sangsangoenna nga impeachment case.
Inbatad ni Chua, mabalin nga aramiden a gundaway ti Bise Presidente ti proseso tapno dalusan ti naganna sakbay ti eleksion.
Kunana a no dumanon iti Senado ti kaso ken saan nga agbayag ket maibasura, mabalin daytoy nga usaren ni Duterte kas depensa iti kampania.
Iti agdama, adda pay laeng iti House Committee on Justice ti kaso.
Naikeddeng ti “hearings proper” inton Marso 25 ken naimbitaran ni Duterte nga agatendar nupay adda ti paglasinan a saan daytoy a sumango.
Inpaganetget ni Chua a ti impeachment ket maysa a “test of character” para iti asinoman nga agkalikagum nga agbalin a Presidente.
Kabayatanna, daytoy ti maikadua a daras iti uneg ti dua a tawen a sumangsango iti impeachment proceedings ni Duterte.
