LAOAG CITY – Nangiparuk-at ti Senate impeachment court ti baro a subpoena para kadagiti dua a dati a branch manager ti Land Bank of the Philippines nga agtestigo iti agtultuloy nga impeachment trial ni Vice President Sara Duterte inton Mierkoles, Hulio 29.
Ti pannakaiparuk-at ti subpoena para kadagiti dua a dati nga opisial ti Land Bank ket adda ti pakainaiganna iti Article I ti Articles of Impeachment a mangtingtingiting iti maipagarup a saan nga umno a panagusar ni Duterte iti P612.5 million a confidential funds – pakairamanan ti P500 million manipud iti Office of the Vice President ken P112.5 million a manipud met iti Department of Education.
Segun ken ni House Lead Prosecutor Gerville Luistro, ni Constantino ti umuna a sumango kas witness ken sarunoen daytoy ni Camposano.
Maipalagip nga idi laeng Martes, Hulio 21, inbabawi ti korte ti immuna a naiparuk-at a subpoena para kadagiti dua a dati a pannakabagi ti Land Bank kabayatan ti agtultuloy a cross-examination ken ni National Bureau of Investigation (NBI) Director Melvin Matibag idi kalman.
Kabayatanna, manamnama ti panagtultuloy ti impeachment trial inton Hulio 29, alas-10 ti bigat, inton malpas ti maikalima nga State of the Nation Address (SONA) ni Presidente Ferdinand Marcos Jr. inton Hulio 27 ken ti naikeddeng a “Kontra-SONA” dagiti senador manipud iti biang ti minorya.
