LAOAG CITY – Nalidem nga agballigi a makadanon iti Kamara de Representantes ti main-inaw a panangiwayat ti impeachment kontra ken ni Presidente Ferdinand Marcos Jr.
Inbatad ni National Unity Party (NUP) Party Chairman ken Antipolo City Rep. Ronaldo Puno, awan ti natibker a ground tapno mangipila ti impeachment kontra iti Presidente.
Inaramid ni Puno ti rakurak mainaig iti maipagarup a planplanoen dagiti kritiko ti administrasion a mangipila ti impeachment kontra ken ni Presidente Marcos ita a 20th Congress.
Inpettengna nga iti agdama ket awan met ti makitkitada a panaglabsing ni Presidente Marcos iti Konstitusion.
Mainaig iti daytoy, inpasigurado ni Puno a saan a suportaran dagiti opisial ken miembro ti National Unity Party ti aniaman nga impeachment nga ipila kontra ken ni Marcos.
Mainaig iti daytoy, naruay a kaalyado iti Kamara de Representantes ni Marcos isut gapuna a marigatan a makadanon ditoy ti impeachment kontra kenkuana.
Iti proseso ti impeachment, mangrugi daytoy iti Kamara de Representantes a kasapulan nga iyendorso ti asinoman nga agpanpanday linteg sakbay daytoy a denggen iti panel ken pagbubutosan iti plenario.
Kabayatanna, no bilang makapasa ken mapatibker daytoy iti plenario no makaala ti mayorya ti butos kadagiti Kongresista ket sumaruno a maikabil iti Senado.
