LAOAG CITY – Nasakit ti nakem ni Barangay Captain Thomasa Ofilas iti Barangay Medina iti ili ti Dingras kalpasan a naglibak ken saan nga umiso nga impormasyon ti inbaga ni IN-C1337 bayat ti pannakisarsarita kenkuana ti contact tracing team.
Ni IN-C1337 ket maysa a babai, agtawen ti 53 ken residente iti nasao a barangay.
Segun kenni Ofilas, saan nga inpudno ni IN-C1337 a malaksid iti anak na ken ti live-in partner ti anak na ket adda pay ti dua a kabagyan da a nagatendar ti pasken iti Barangay Tabtabagan iti ili ti Banna idi Abril 3, ita a tawen.
Inlawlawag na a kalpasan ti sumagmamano nga aldaw ket inadmitir met laeng ni IN-C1337 no siasinno pay dagiti kadua da a nagatendar ti pasken iti ili ti Banna.
Gapo iti daytoy, dimmalan iti swab test dagiti dua no sadinno ket positibo iti virus ti maysa kadagitoy nga isu ti IN-C1419, lalaki, agtawen ti 47 ken residente iti barangay da, idinto a negatibo ti maysa.
Kinumpirmaran ni Ofilas a maysa kadagiti indibidual a saan nga inpakammo ni IN-C1337 ket nakaruar latta iti pagtaengan da ken nakapulapol da nga opisyales ti barangay.
Mainaig iti daytoy, umabot met iti 40 a residente ti dumalan iti swab test ita nga aldaw pakairamanan da nga opisyales ti barangay.
Kabayatanna, naipatungpal ti lockdown iti sibubukel a Sitio 2 a pagnanaedan ni IN-C1337 ken 52 a pamilya ti apektado kasta pay iti sumagmamano a paset ti Sitio 3 a residensya met ni IN-C1419 no sadinno ket 20 a pamilya ti naapektaran.
Maipalagip a ti sibubukel a pamilya iti Barangay Tabtabagan iti ili ti Banna a napanan da IN-C1337 ken IN-C1419 ket nagpositibo met it covid-19.
