LAOAG CITY – Pimmusayen ti maysa kadagiti nagpositibo iti covid-19 a ni IN-C2033, lalaki nga agtawen ti 55 ken residente iti Barangay 54-B Camangaan ditoy ciudad ti Laoag.
Segun kenni Brgy Chairman Andres Guillermo Jr. iti nasao a barangay, sakbay a naduktalan a nagpositibo iti covid-19 ti biktima ket lima nga aldaw a naggurgurigor ni IN-C2033.
Inlawlawag na a rabii laeng nga adda iti barangay da gapo ta daytoy ket kabo iti STL ken mapmapan iti Barangay 6.
Saan met pay a makumpirmaran ni Guillermo sadinno ti nakaalaan ni IN-C2033 ti covid-19.
Innayon ni Guillermo a ti bangkay IN-C2033 ket naicremate idiay ciudad ti Vigan.
Ummunan a kinumpirmaran ni gobierno probinsyal a ni IN-C2033 ket naitaray iti emergency room iti maysa a pribado nga ospital gapo iti gurigor ken marigatan nga umanges.
Naiyakar daytoy iti Mariano Marcos Memorial Hospital and Medical Center iti ciudad ti Batac ken ditoy a pimmusay.
