LAOAG CITY – Kinumpirmaran ni Mayor Alfredo “Boying’ Valdez Jr. iti ili ti San Nicolas a pimmusayen ni IN-C2139 a maysa a babai nga agtawen ti 62 iti Barangay 1, San Francisco iti nadakamat nga ili.
Segun kenni Valdez, idi nalpas ti chemotherapy ni IN-C2139 ket nagkapsot ti bagi na ken nagturong pay ditoy ciudad ti Laoag, ken idi aldaw ti Lunes a naamoan na a nakapsot ti pasyente.
Gapo iti daytoy, kuna ni Valdez a naipan iti ospital ti pasyente ken ditoy a naduktalan ti sakit na a pneumonia ken kas protocol ket dimmalan iti RT-PCR test ken positibo daytoy iti covid-19.
Inlawlawag na a naka-isolate metten ti pamilya ni IN-C2139 iti ili ti San Nicolas pakairaman ditoy ciudad ti Laoag ken dimmalan dan iti swab test no sadinno ket maiyur-uray laeng ti resulta dagitoy.
Naamoan a ni IN-C2139 ket isu ti maikatlo a pimmusay iti nasao nga ili kalpasan a nagpositibo da iti covid-19, ken ti bangkay na ti ma-cremate.
Innayon ni Valdez a ni IN-C2139 ket nakapulapol na iti ospital ni IN-C2164 a taga Barangay Mabaleng iti ciudad ti Batac ken daytoy ket pimmusay met idi rabii.
Kabayatanna, agyamyaman ni Valdez gapo ta bumabbaba metten ti kaso ti covid-19 iti nasao nga ili.
